Deputeti i Kuvendit të Kosovës, Avni Dehari, në një rrëfim emocional për emisionin “Pressing One”, ka folur mbi vdekjen e djemve të tij, Arbnorit dhe Astritit. Gjatë bisedës, ai theksoi se kishte një marrëdhënie shumë të afërt me të dy djemtë, duke i përshkruar ata si të rinj që kishin të ardhmen përpara.
Sipas Avni Deharit, rrethanat e vdekjes së dy djemve kanë qenë të ndryshme. Ai tregoi se djali i tij, Arbnori, kishte ndërruar jetë pas rënies nga kati i pestë i banesës, ndërsa theksoi se historia e vdekjes së Astritit ka qenë ndryshe. Lidhur me hetimet, deputeti vlerësoi se institucionet e drejtësisë nuk kanë përmbushur detyrat e tyre në mënyrën e duhur.
“Fatkeqësia më e madhe është që Prokuroria nuk e ka bërë punën që duhet të bënte dhe i ka lënë këto raste të hapura”, deklaroi Dehari. Ai shtoi se mosmbyllja e këtyre rasteve siç duhet, ka sjellë rritjen e dyshimeve mbi dinamikën e ngjarjeve. Në intervistën e tij, ai nënvizoi se humbja e të dy djemve, ku Arbnori sapo kishte mbaruar fakultetin ndërsa Astriti ishte absolvent, ka përbërë një goditje jashtëzakonisht të rëndë për familjen e tij. Ai gjithashtu u shpreh se me djemtë e tij kishte pasur raporte shumë të afërta dhe se kishin biseduar gjithmonë lirshëm.