Avokati Gent Gjini ka paraqitur zyrtarisht padinë në Departamentin Civil të Gjykatës Themelore në Prishtinë, duke kërkuar sqarim përmes rrugëve ligjore për kontributin e Dritan Goxhajt gjatë luftës në Kosovë. Nisma vjen pas publikimit të një dokumenti nga kryeministri Edi Rama, i cili ka ngritur dyshime mbi autenticitetin e figurës së Goxhajt si ish-pjesëtar i UÇK-së.
Sipas avokatit Gjini, për shkak të peshës publike të deklaratave të kryeministrit Rama, është bërë e domosdoshme që kjo çështje të trajtohet në gjykatë për të konfirmuar nëse Goxhaj posedon statusin e veteranit dhe për të qartësuar vendin apo frontin ku ai mund të ketë shërbyer. Padia mbështetet gjithashtu në qëndrimet e Organizatës së Veteranëve të Luftës së UÇK-së, e cila ka bërë të ditur se Goxhaj nuk ka aplikuar për statusin e veteranit dhe nuk figuron me kartelë veterani.
Nëpërmjet ekspertizave gjyqësore, pritet të shqyrtohet vërtetësia e dokumentacionit të publikuar dhe të qartësohet historiku i kontributit të Goxhajt gjatë periudhës së luftës. Synimi i kësaj padie, siç deklaroi Gjini, është mbyllja e dilemave dhe spekulimeve në opinionin publik nëpërmjet një vendimi zyrtar të gjykatës.