Kryeministri Edi Rama ka reaguar ndaj Dritan Goxhajt, i cili u shfaq si zëdhënës i kërkesave gjatë protestës së fundit para Kryeministrisë. Përmes një postimi në rrjetet sociale, kreu i qeverisë publikoi një video-dëshmi, ku një shtetas i identifikuar si Xheladin Gashi (i njohur si Komandant Plaku), njëri prej themeluesve të UÇK-së, hedh akuza mbi rolin e Goxhajt gjatë luftës.
Sipas dokumentit të publikuar, Dritan Goxhaj dhe babai i tij, Dilaver Goxhaj, nuk kanë luftuar si vullnetarë, por janë paguar nga UÇK-ja për të stërvitur oficerë. Në dëshmi pretendohet se më 14 prill 1999, në qendrën stërvitore në Helshan, Dritan Goxhaj solli katër oficerë të ushtrisë shqiptare: Arqil Mandro, Ermir Begaj, Dritan Dyrmishaj dhe Agim Sallaku, me qëllim stërvitjen e forcave të UÇK-së.
Videoja pretendon se Goxhaj është larguar drejt Tiranës pas një përgjigjeje refuzuese ndaj kolegëve që e pyesnin për qëndrimin në luftë. Gjithashtu, akuzohet se ka tërhequr pagesa të parregullta nga arkivat e UÇK-së edhe pas largimit, duke përfituar shuma prej 1600 markash për periudhat e majit dhe qershorit, si për vete ashtu edhe për oficerët e tjerë.
Kryeministri Rama e shoqëroi materialin me komentin: “Dje ‘Komandant’ me pagesë, po sot shërbëtor me çfarë?”, duke vënë në pikëpyetje integritetin e Dritan Goxhajt në rolin e tij si përfaqësues i kërkesave të protestuesve.