Pas një reagimi publik të deputetes Marjana Koçeku në rrjetet sociale, përmes të cilit ajo i drejtohej familjes Bajri me një paralajmërim lidhur me mbrojtjen e familjarëve të saj, ka ardhur reagimi zyrtar nga përfaqësuesi ligjor i familjes, avokati Sokol Tahiraj.
Në mesazhin e saj, Koçeku shkroi: “Ky mesazh i drejtohet Bajrajve të Shkodrës. Nëse familjes teme i preket kjoftë edhe nji qime floku, unë s’kam me lanë pa ju shkatërrue, sa ta kem jetën”. Deputetja nuk ka ofruar detaje shtesë mbi rrethanat e pretenduara të kërcënimit.
Avokati Sokol Tahiraj i ka kundërshtuar këto pretendime, duke i cilësuar ato si të pabazuara dhe denigruese. Sipas Tahirajt, deklaratat e tilla cenojnë dinjitetin dhe parimin e prezumimit të pafajësisë, të garantuar nga Kushtetuta e Republikës së Shqipërisë dhe Konventa Evropiane për të Drejtat e Njeriut.
“Në një shtet të së drejtës, askush nuk mund të shpallet fajtor apo të etiketohet publikisht mbi bazën e deklaratave politike, perceptimeve personale apo insinuatave mediatike. Çdo pretendim për përgjegjësi penale duhet të mbështetet në prova dhe të vlerësohet vetëm nga organet kompetente të drejtësisë”, u shpreh avokati.
Në fund të deklaratës së tij, Tahiraj i bëri thirrje deputetes që, nëse disponon prova konkrete, t’i paraqesë ato pranë institucioneve të drejtësisë dhe jo në rrjete sociale. Ai konfirmoi se ekipi i mbrojtjes po shqyrton të gjitha mjetet ligjore në dispozicion, duke përfshirë kallëzime për shpifje, për të mbrojtur të drejtat e klientëve të tij ndaj gjuhës që ai e konsideron denigruese dhe stigmatizuese.