Ministri i Drejtësisë, Toni Gogu, komentoi për herë të parë pretendimet e deputetes Marjana Koçeku, e cila pas largimit nga Partia Socialiste, deklaroi se është kërcënuar nga grupi i Bajrajve në Shkodër.
Në një prononcim për gazetarët jashtë ambienteve të Kuvendit, ministri Gogu u shpreh se denoncimi për kërcënim nuk përbën një lajm politik, por një çështje që i takon shtetit të së drejtës. Ai kërkoi që institucionet ligjzbatuese të zbatojnë urgjentisht detyrën për të zbardhur ngjarjen.
"Kur një qytetar, aq më tepër një deputet, sinjalizon për kërcënim, ky nuk është lajm politik, është lajm që i takon shtetit të së drejtës. Asnjë qytetar nuk mund të jetojë nën fuqinë e kërcënimit, por kjo është punë për organet hetimore dhe ligjzbatuese, si Policia e Shtetit dhe SPAK", deklaroi Gogu.
Ministri shprehu solidaritet me deputeten, duke nënvizuar se kur një anëtar i Kuvendit ngre shqetësime të tilla, kjo tregon se është cenuar institucioni përfaqësues. Ai shtoi se çështja meriton vëmendje të plotë shtetërore për t'u hetuar dhe konfirmoi gatishmërinë për të komunikuar me deputeten Koçeku në lidhje me këtë situatë.