Deputetja Marjana Koçeku, e cila pak ditë më parë njoftoi largimin nga grupi parlamentar i Partisë Socialiste për të vijuar si deputete e pavarur, ka reaguar ndaj kërkesave për dorëzimin e mandatit. Në një mesazh të publikuar në rrjetet sociale, ajo hodhi poshtë pretendimet se mandati i përket partisë, duke deklaruar se ai ka "ardhur në vend të vet".
Në kundërpërgjigje ndaj kritikave, Koçeku sfidoi mazhorancën dhe kryeministrin Edi Rama që, nëse janë të sigurt për mbështetjen e tyre, të ndërmarrin hapat për shpërndarjen e Parlamentit dhe zhvillimin e zgjedhjeve të parakohshme. Ajo theksoi se ky do të ishte momenti për të matur forcat politike, ndërsa konfirmoi synimin e saj për të kandiduar në Tiranë.
"Nuk ua kam marrë mandatin e deputetit. Ma keni marrë ju mua, për 10 muaj rresht. Tash mandati ka ardhur në vend të vet. Nëse jeni kaq të sigurt që unë nuk fitoj pa ju dhe ju i keni plot 83 mandate, atëherë shpërndajeni parlamentin, shkojmë në zgjedhje të parakohshme dhe masim forcat se kush fiton çka", shkruan deputetja, duke shoqëruar reagimin e saj me tone ironike.
Përditësime
Deputetja Marjana Koçeku deklaroi se mandatin e saj e ka fituar falë renditjes në listën e Partisë Socialiste për qarkun e Shkodrës, duke kundërshtuar pretendimin e krerëve të PS se mandati i përket partisë. Në një reagim ironik, Koçeku u shpreh se në fushatën e ardhshme në Tiranë do të përdorë 'kecin e saj të shtrenjtë' dhe 'kmesën e mprehtë' si mjete të komunikimit politik.