Deputetja Marjana Koçeku, e cila kryesoi listën e kandidatëve të Partisë Socialiste në qarkun e Shkodrës gjatë zgjedhjeve parlamentare të vitit 2025, ka njoftuar shkëputjen e saj nga grupi parlamentar i mazhorancës. Nëpërmjet një deklarate publike, ajo bëri të ditur se do të vazhdojë veprimtarinë e saj si deputete e pavarur në Kuvendin e Shqipërisë.
Në mesazhin e saj, Koçeku shkroi: “Prej sot jam deputete e pamvarun. Idealet e vlerat e mia janë ato që i kam pasë e i kam shprehë qysh para se me u asociu me nji parti. Ato m’i diftojnë kufijtë”. Deputetja nuk ka ofruar detaje shtesë mbi shkaqet e këtij vendimi. Ndërkohë, mbetet për t'u sqaruar nëse largimi i saj është formalizuar zyrtarisht pranë strukturave përkatëse të Kuvendit dhe të Partisë Socialiste.
Ky vendim u shoqërua me reagime nga pjesëmarrësit në protestat e zhvilluara në shesh, të cilët e mirëpritën njoftimin e deputetes, duke e lidhur atë me zhvillimet politike aktuale.
Përditësime
Partia Socialiste ka mbledhur urgjentisht Kryesinë dhe Grupin Parlamentar pas largimit të deputetes Marjana Koçeku. Vendimi pason mungesën e saj në festimet e 34-vjetorit të partisë në sheshin 'Italia'. Lëvizja vjen në një periudhë tensionesh politike, ndërkohë që në disa qytete të vendit po zhvillohen protesta kundër qeverisë.
Anëtari i Këshillit Bashkiak të Tiranës, Alfred Muharremi, i ka kërkuar zyrtarisht deputetes Marjana Koçeku dorëheqjen nga mandati i saj. Ndërkohë, kryetari i grupit parlamentar të Partisë Socialiste, Taulant Balla, nuk ka bërë ende një koment lidhur me këtë kërkesë. Burime pranë selisë rozë bëjnë me dije se mes Ballës dhe Koçekut nuk është vendosur ende asnjë kontakt.
Deputetja 25-vjeçare Marjana Koçeku njoftoi largimin nga grupi parlamentar i Partisë Socialiste përmes një reagimi në Facebook, ku kërkoi 'forcë dhe frymë urtësie'. Burime pranë partisë bëjnë me dije se Taulant Balla nuk ka qenë në dijeni të këtij vendimi dhe nuk ka arritur të komunikojë me të. Ky vendim, i ndërmarrë pas vetëm 9 muajsh në parlament, ka nxitur debate të ndara në rrjetet sociale, me një pjesë të publikut që i kërkon dorëzimin e mandatit me argumentin se ai është përfituar përmes listave të mbyllura të PS.