Kryetari i Bashkisë së Lezhës, Pjerin Ndreu, ka reaguar pas vendimit të deputetes Marjana Koçeku për t’u larguar nga grupi parlamentar i Partisë Socialiste. Përmes një mesazhi në rrjetet sociale, Ndreu vlerëson se, ndonëse ndryshimi i bindjeve politike është i drejtë, mbajtja e mandatit në këtë rast cenon etikën.
Sipas Ndreut, Koçeku ishte renditur në krye të listës së Partisë Socialiste në qarkun e Shkodrës pa pasur kontribute të mëparshme politike, ndaj dorëzimi i mandatit do të ishte një akt fisnikërie. Kryebashkiaku theksoi se ky mandat është fituar në sajë të votave të mijëra socialistëve dhe keqpërdorimi i tij përbën shkelje besimi.
“Kushdo, në kushte e rrethana të tjera, mund të ndryshojë mendim apo ide. Por nderi i caktimit në krye të listës politike të qarkut më të madh në veri, pa asnjë kontribut politik të mëparshëm, moralisht nuk duhet të keqpërdoret”, shprehet Ndreu.
Në reagimin e tij, ai ka përdorur edhe një shprehje tradicionale për të ilustruar qëndrimin e tij, duke shtuar se largimi i deputetes nuk ndikon negativisht në funksionimin e Partisë Socialiste. “Duhet të mbizotërojë morali i malësorit: aty ku ha bukë, nuk përmbys kupën”, përfundon Ndreu.