Endrit Shabani, Avokati i Popullit i Shqipërisë, priti në një takim zyrtar Koordinatoren e Përhershme të Kombeve të Bashkuara në Shqipëri, Ingrid Macdonald.
Ky takim erdhi pas marrjes nga Shabani të mandatit si President i Organizatës së Avokatëve të Popullit të Mesdheut (AOM).
Gjatë bisedës, vëmendja u përqendrua te gjendja aktuale e të drejtave të njeriut në Shqipëri dhe domosdoshmëria e angazhimit të koordinuar mes institucioneve vendase e aktorëve ndërkombëtarë. Shabani dhe Macdonald nënvizuan se mbrojtja e të drejtave të njeriut dhe konsolidimi i shtetit të së drejtës janë shtyllat kryesore për përpjekjet e përbashkëta që përshpejtojnë progresin e Shqipërisë drejt Bashkimit Evropian.
Në këtë kuadër, u diskutua rëndësia e sinkronizimit të veprimtarisë së Avokatit të Popullit me agjencitë e Kombeve të Bashkuara.
Macdonald vlerësoi vizionin e ri të institucionit dhe rikonfirmoi mbështetjen e Kombeve të Bashkuara për nismat që forcojnë institucionet demokratike dhe garantojnë një shoqërie më të drejtë e transparente për qytetarët shqiptarë.