Mustafa Martinaj, babai i Ervis Martinajt, ka dëshmuar sot në Gjykatën e Posaçme kundër Korrupsionit dhe Krimit të Organizuar. Dëshmia u dha në kuadër të procesit për sekuestrimin e pasurive të lidhura me të birin, i cili rezulton i zhdukur që prej gushtit të vitit 2022.
Ai tha se aktiviteti i tij financiar ka qenë gjithmonë i deklaruar dhe se në vitin 1999 ka transportuar mbi 800 mijë dollarë cash me makinë nga Tirana drejt Rubikut dhe Rrëshenit. Martinaj theksoi se paratë ishin të aktivitetit të tij të ligjshëm dhe se nuk i kishte ndodhur asnjë incident gjatë asaj periudhe.
Babai i Ervis Martinajt foli edhe për arsimimin e të birit. Sipas tij, Ervisi studioi ekonomi në Parma të Italisë rreth viteve 2000-2001 me bursë, por më pas u kthye në Shqipëri për të jetuar me motrat. Ai shtoi se djali ishte i punësuar dhe i pavarur.
Në lidhje me aktivitetin e djalit, Mustafa Martinaj deklaroi se nga viti 2008 e në vijim Ervisi merrej me pika llotosh me licencë dhe se të gjitha detyrimet ishin paguar plotësisht. Ai theksoi se vetë nuk ka pasur kurrë aktivitet me lojëra fati.
Martinaj tregoi se Ervisi jetoi me familjen në Laç deri ditën e zhdukjes, më 9 gusht 2022. Ai shtoi se pas zhdukjes policia ka shkuar 23 herë në shtëpi. Gjithashtu, ai konfirmoi se një banesë e sekuestruar iu dhurua Elio Hatos, sepse ky i fundit i shpëtoi jetën djalit në një ngjarje në zonën e ish-Bllokut në vitin 2018.