Në seancën e kësaj të mërkure pranë Gjykatës së Posaçme Kundër Korrupsionit dhe Krimit të Organizuar (GJKKO), Kujtim Mermali dëshmoi në lidhje me vrasjen e djalit të tij, Elton Mermali (i njohur edhe si Alban Semaku), ngjarje që është pjesë e dosjes hetimore kundër grupit të Laert Haxhiut.
Babai i viktimës rrëfeu se i biri u largua nga banesa të shtunën në mbrëmje, një natë para se të gjendej i vrarë në tetor të vitit 2021. Pas lirimit nga burgu i Peqinit më 6 maj 2021, Mermali deklaroi se i biri nuk ishte në gjendje të mirë shëndetësore dhe nuk ishte i punësuar. Ai shtoi se djali i kishte treguar se do të takohej me Artan Tafanin, i cili do ta ndihmonte për të gjetur një punë.
Lidhur me marrëdhënien me të pandehurin Laert Haxhiun, dëshmitari pohoi se e njihte mirë që në fëmijëri. Sipas tij, Haxhiu frekuentonte shtëpinë e familjes Mermali dhe ishte strehuar aty në periudha kur dhunohej nga i ati. Megjithatë, Kujtim Mermali theksoi se nuk kishte dijeni për motivet e vrasjes dhe nuk mund të akuzonte askënd për këtë ngjarje.
Gjatë dëshmisë u trajtua edhe e kaluara gjyqësore e viktimës, i cili ishte arrestuar fillimisht në Itali në vitin 2004 nën akuzën për vrasjen e Artan Sulçes në Shqipëri gjatë vitit 1997. Kujtim Mermali mbështeti versionin se i biri nuk kishte qenë i përfshirë në atë ngjarje dhe se nuk kishte pasur informacione për ndonjë kërcënim të drejtpërdrejtë ndaj tij përpara ekzekutimit.