Hykmete Bajrami, deputete e Lidhjes Demokratike të Kosovës (LDK), kërkoi përgjegjësi për mospërfundimin e rrugës Prishtinë–Podujevë. Në një postim në Facebook, më 21 tetor 2026, ajo rikujtoi zotimin e kryeministrit Albin Kurti, të bërë më 2 nëntor 2021, se punimet në këtë aks rrugor do të përfundonin gjatë vitit 2022.
Bajrami shkroi se, gati pesë vjet pas afatit të premtuar, rruga ende nuk ka përfunduar. Ajo e lidhi vonesën me kritikat ndaj qeverisjes së Kurtit dhe kërkoi përgjegjësi. Në postimin e saj, deputetja shkroi: “Gjashtë vjet e mbi 20 miliardë euro buxhet të humbura, pa lënë asnjë shenjë në këtë vend”.
Për të rikujtuar zotimin, Bajrami publikoi një video-lajm të vitit 2021. Në të, Kurti shfaqet gjatë një vizite në rrugë me Shpejtim Bulliqin, kryetarin e atëhershëm të Komunës së Podujevës. Kurti kishte kritikuar zvarritjen e punimeve dhe ishte zotuar se sektori i dytë do të përfundonte deri në fund të vitit 2021, ndërsa punimet e plota do të përmbylleshin gjatë vitit pasues.
Në deklaratën e atëhershme, Kurti e cilësoi vonesën të dëmshme dhe të paarsyeshme. Ai e përshkroi rrugën si lidhëse mes Llapit dhe kryeqytetit dhe tha se përfundimi i saj do t’ua lehtësonte udhëtimin njerëzve që përballeshin me trafik të dendur.