Hykmete Bajrami, ish-deputetja e Lidhjes Demokratike të Kosovës, ka kritikuar emërimin e tre zëvendësministrave nga kryeministri në detyrë Albin Kurti.
Në një postim në Facebook, ajo shkruan se qeveria është në dorëheqje dhe ministrat kanë kompetenca të kufizuara, duke mos punuar me kapacitet të plotë. Sipas saj, Kurti po emëron zëvendësministra jo për punë, sepse nuk ka nevojë urgjente, por për të marrë pagë nga buxheti i shtetit pa bërë asgjë.
Bajrami e cilëson këtë veprim zhvatje të buxhetit dhe abuzim me pozitat zyrtare. Ajo thekson se dëmi nuk kufizohet te shpenzimet e menjëhershme, por te standardi i vendosur nga LVV, që trajton shtetin si pronë partiake dhe mjet për shpërblimin e militantëve.
Këto standarde, sipas saj, do t'i kushtojnë shtrenjtë Kosovës në të ardhmen. Bajrami përfundon duke kërkuar që LVV të shkojë në opozitë, sepse e ka gërryer shtetin.
Kujtohet se ushtruesja e detyrës së presidentes, Albulena Haxhiu, ka caktuar zgjedhjet e parakohshme për 7 qershor, pas konsultave me partitë politike dhe mosarritjes së marrëveshjes për zgjedhjen e presidentit.
Përditësime
Ali Dula u emërua zëvendësministër në Ministrinë për Zhvillim Rajonal, Agon Batusha në Ministrinë e Administrimit të Pushtetit Lokal dhe Hysni Mehanaj në Ministrinë e Financave.
Vlora Çitaku (PDK) i cilësoi emërimet si abuzim ndaj institucioneve.