Kryenegociatori i Kosovës për dialogun me Serbinë, Agron Bajrami, ka reaguar pas deklaratave të presidentit serb, Aleksandar Vuçiq, i cili gjatë promovimit të oficerëve të rinj të ushtrisë u kërkoi atyre mbrojtjen e asaj që e quajti “tokë të shenjtë të Serbisë”, duke aluduar për Kosovën.
Në një postim në platformën “X”, Bajrami theksoi se dialogu nuk mund të jetë i besueshëm për sa kohë që Beogradi vazhdon të pretendojë territorin e palës tjetër. Ai akuzoi pushtetin në Serbi për riciklim të gjuhës së viteve ’90 dhe ëndrra për përsëritjen e spastrimit etnik, duke nënvizuar se Kosova nuk do ta negociojë ekzistencën e saj.
Reagimi i Bajramit mbështeti qëndrimin e organizatës “Demokratët Evropianë”, të cilët dënuan retorikën e Vuçiqit dhe të ministres serbe Snezhana Paunoviq. Sipas tyre, Vuçiq po ringjall retorikën që minon pajtimin, ndërsa vëmendje e veçantë iu kushtua deklaratës së bërë nga Paunoviq dy javë më parë lidhur me ngjarjet e vitit 1998.
“Lidershipi definohet jo vetëm nga qëndrimet që merr, por edhe nga retorika që toleron dhe legjitimon. Ballkani Perëndimor ka nevojë për lidership të përgjegjshëm të përkushtuar ndaj dialogut dhe pajtimit”, thuhet në reagimin e kësaj organizate.
Nga ana tjetër, ministri në detyrë i Mbrojtjes i Kosovës, Ejup Maqedonci, u shpreh se qytetarët duhet të ndihen të sigurt. Ai bëri të ditur se Ministria e Mbrojtjes po punon intensivisht për modernizimin e armatimit dhe pajisjeve të Forcës së Sigurisë së Kosovës, duke ngritur kapacitetet operacionale dhe ndërveprueshmërinë me aleatët ndërkombëtarë për të garantuar sovranitetin dhe sigurinë e vendit.
Përditësime
Eksperti i sigurisë, Valdet Hoxha, ka paralajmëruar se qasja e presidentit të Serbisë, Aleksandar Vuçiq, ndaj Kosovës po ndjek modele autoritare të ngjashme me ato të Sllobodan Millosheviqit. Hoxha veçoi sulmin në Banjskë dhe kërcënimet ndaj infrastrukturës së Ibër-Lepencit si tregues të rrezikut të retorikës aktuale. Deklaratat e fundit të Vuçiqit, ku ai iu referua Kosovës si pjesë e Serbisë bazuar në 'Kushtetutë dhe drejtësi hyjnore', janë interpretuar nga analistët si sinjal për mundësinë e përshkallëzimit të mëtejshëm të tensioneve politike.