Kreu i Grupit Parlamentar të Partisë Socialiste, Taulant Balla, ka zhvilluar një përplasje në distancë me historianin Olsi Jazexhi. Reagimi i Ballës erdhi pasi Jazexhi shpalli publikisht kërkesën për një avokat që do ta ndihmonte të ngrinte një padi për shpifje ndaj Ballës, lidhur me akuzat e mëparshme për lidhje me Iranin.
Në një përgjigje të ashpër, Balla e etiketoi Jazexhiun si "shërbëtor të shtetit terrorist të Iranit" dhe "gjakprishur". Ai e ftoi historianin të rikthehet në Shqipëri për të zhvilluar betejën gjyqësore, duke shtuar me ironi se gjyqi mund të mbahet te Laguna e Nartës, "dhe shohim se me kë qeshin edhe flamingot".
Në të njëjtin mesazh, Balla u drejtua edhe protestuesve në shesh, duke pretenduar se Jazexhi po tallet me ta përmes deklaratave se ka rënë dakord me qeverinë e Iranit që droni më i ri i regjimit të quhet "Flamingo". Kjo përplasje shënon një përshkallëzim të retorikës mes dy palëve lidhur me qëndrimet e njohura të Jazexhiut mbi politikën ndërkombëtare.