Kryetari i Grupit Parlamentar të Partisë Socialiste, Taulant Balla, në cilësinë e bashkëkryetarit të Këshillit Kombëtar të Integrimit Europian, zhvilloi një bashkëbisedim me të rinj shqiptarë të Maqedonisë së Veriut. Gjatë takimit, Balla deklaroi se shqiptarët në shtetin fqinj janë kombësi shtetformuese dhe jo minoritet etnik. Ai theksoi se e drejta për shkollim dhe përdorimi i gjuhës shqipe në institucione, shkolla dhe universitete përbën një detyrim që nuk mund të negociohet.
Sipas Ballës, respektimi i Marrëveshjes së Ohrit është element thelbësor për stabilitetin e vendit dhe rrugëtimin e tij drejt Bashkimit Europian. Ai paralajmëroi se çdo cenim i këtyre të drejtave është një hap kundër së ardhmes europiane të Maqedonisë së Veriut.
Duke iu referuar zhvillimeve në hapësirën shqiptare, Balla denoncoi shfaqjen e ndasive dhe frymës antiamerikane apo antisemite, duke i cilësuar si të sponsorizuara nga aktorë jomiqësorë. Ai ritheksoi se marrëdhëniet e shqiptarëve me Shtetet e Bashkuara të Amerikës mbeten të pazëvendësueshme për historinë dhe të ardhmen e kombit.
Në një tjetër pjesë të bashkëbisedimit, Balla komentoi reagimet mbi projektin mjedisor në Zvërnec. Ai mbrojti ndërhyrjen e qeverisë, duke kujtuar se moratoriumi i gjuetisë, i vendosur pas vitit 2013, mundësoi rikthimin e flamingove në atë zonë. Balla kritikoi disa nga ambientalistët që kundërshtojnë projektin, duke deklaruar se mes tyre ka pasur persona që shprehin mbështetje për regjimin e Iranit.