Presidenti i Republikës së Shqipërisë, Bajram Begaj, zhvilloi një takim zyrtar me kryetarin e Parlamentit të Maqedonisë së Veriut, Afrim Gashi. Në qendër të diskutimeve ishin marrëdhëniet e miqësisë, sfidat e shqiptarëve në Maqedoninë e Veriut dhe mbrojtja e të drejtave të tyre themelore.
Lidhur me përfaqësimin e shqiptarëve në institucionet e shtetit fqinj, Presidenti Begaj nënvizoi se ligji për përfaqësimin adekuat dhe Marrëveshja e Ohrit nuk janë për diskutim, por për zbatim. Ai theksoi se garantimi institucional i të drejtave, përmes një kornize ligjore detyruese, është thelbësor për avancimin e Maqedonisë së Veriut drejt proceseve të integrimit në Bashkimin Evropian.
Një tjetër pikë kyçe e takimit ishte çështja e studentëve të Jurisprudencës, të cilët kanë kërkuar të drejtën për t'iu nënshtruar provimeve në gjuhën shqipe. Presidenti Begaj kërkoi angazhimin e kryeparlamentarit Gashi për gjetjen e një zgjidhjeje ligjore për këtë kërkesë, duke nënvizuar se shqiptarët përbëjnë një faktor shtetformues dhe se bashkëjetesa ndëretnike është jetike për stabilitetin e vendit.
Gjatë bisedës, palët diskutuan edhe mbi rolin e diasporës shqiptare, të cilën Presidenti e përshkroi si "fuqia dhe zemra e kombit", si dhe mbi nevojën për bashkëpunim të ngushtë ndërmjet faktorit politik shqiptar për mbrojtjen e interesave të tyre.