Në seancën parlamentare të Maqedonisë së Veriut në 27 shkurt 2026, deputeti Rijad Shaqiri, anëtar i Aleancës për Shqiptarët, mbarti një spilë flamuri shqiptar në jakën e xhaketës. Ky simbol, të cilin ia kishte dhuruar kryeministri shqiptar Edi Rama, tërhoqi vëmendjen e kryeministrit Hristijan Mickocski.
Mickocski shprehu pakënaqësi për mungesën e simbolit të Maqedonisë së Veriut dhe i tha deputetit: «Herën tjetër kur të vini në Kuvend, që përveç flamurit shqiptar, që është flamur etnik i popullit që i përkisni, do ta keni dhe atë të Maqedonisë, sepse nga ky shtet merrni pagë».
Shaqiri u përgjigj se mburret që është shqiptar dhe se do ta mbante flamurin maqedonas nëse Mickocski ia dhuronte. «Është fakt se unë e kam simbolin tim kombëtar, edhe mburrem se jam shqiptar. Këtë ma ka dhënë kryeministri i Shqipërisë, kur të ma sillni ju flamurin e Republikës së Maqedonisë, mbledhjen e radhës do të vij me të. Që jam shqiptar, krejt bota e di dhe për këtë jam krenar», deklaroi ai.
Menjëherë pas kësaj, Mickocski i dhuroi spilën me flamurin maqedonas, të cilin Shaqiri e vendosi në xhaketë.
Në një postim në profilin e tij në rrjetet sociale, Shaqiri evidentoi momentin dhe kritikoi trajtimin e simbolit kombëtar shqiptar. Ai përmendi urrejtjen ndaj shqiptarëve në sport, heshtjen institucionale ndaj thirrjeve albanofobe dhe mungesën e përgjigjes për kalimin e 5 ton kanabis në kufirin e Maqedonisë së Veriut. «Kur simboli kombëtar trajtohet si problem, ndërsa krimi dhe urrejtja relativizohen», shkroi ai midis të tjerave.