Kreu i Grupit Parlamentar të Partisë Socialiste, Taulant Balla, ka hedhur poshtë pretendimet për bllokim të negociatave të integrimit të Shqipërisë me Bashkimin Europian. Komentet ai i bëri nga Bundestagu në Berlin, ku zhvilloi një takim me kryetarin Anton Hofreiter dhe anëtarët e Komitetit për Çështjet e Bashkimit Europian.
Balla shprehu mirënjohje për mbështetjen e vazhdueshme të Gjermanisë ndaj Shqipërisë. Në një postim në rrjetet sociale ai theksoi se Shqipëria po vijon përpara drejt përmbylljes së procesit të negociatave brenda vitit 2027.
"Mirënjohje Bundestagut dhe Qeverisë Federale për mbështetjen e vazhdueshme në rrugëtimin europian të Shqipërisë. Ecim përpara drejt përmbylljes së negociatave brenda vitit 2027", ka shkruar Balla.
Ai ironizoi debatet mbi ecurinë e procesit me pyetjen: "Kush tha që janë bllokuar negociatat?". Takimi në Berlin u zhvillua në kuadër të një tur takimesh që përfshin edhe bashkëkryetarët e Këshillit Kombëtar të Integrimit Europian dhe kryetarin e Komisionit për Europën dhe Punët e Jashtme.
Përditësime
Taulant Balla u takua me Rita Schwarzelühr-Sutter, Sekretare Shteti për Mjedisin, Klimën dhe Sigurinë Nukleare. Takimi u fokusua në Kapitullin 27 mbi Mjedisin dhe Ndryshimet Klimatike, ku palët diskutuan avancimin e reformave për standardet e BE-së.
Günther Krichbaum, Ministri i Shtetit për Europën, diskutoi reformën e drejtësisë dhe procesin e vetingut me delegacionin shqiptar. Jorida Tabaku dhe Igli Hasani morën pjesë në takimet në Kancelari dhe Qeverinë Federale. Delegacioni përmendi IBAR-in dhe shprehu pritjen për miratimin e tij në Bruksel, duke deklaruar se Shqipëria është model për vendet e tjera në këtë reformë.