Kryetari i Grupit Parlamentar të Partisë Socialiste, Taulant Balla, reagoi lidhur me protestat e ditëve të fundit, duke theksuar ndikimin e tyre negativ në interesin publik. Në një postim në rrjetet sociale, ai vlerësoi se lëvizja ka degraduar nga karakteri paqësor në bllokim të rrugëve kryesore dhe trafikut.
Sipas Ballës, ky bllokim po godet drejtpërdrejt sektorin e turizmit, i cili është një ndër shtyllat kryesore të ekonomisë shqiptare. Ai theksoi se krijimi i pasigurisë dhe pengimi i lëvizjes së lirë për qytetarët dhe vizitorët sjellin pasoja për bizneset, punësimin dhe zhvillimin e vendit.
Kreu i grupit parlamentar socialist ilustroi qëndrimin e tij duke iu referuar edhe komunikimit me qytetarët, ku evidentoi dëmtimin e imazhit të vendit te të huajt. Protestat, të cilat kanë hyrë tashmë në ditën e 17-të, janë cilësuar nga Balla si pengesë për perspektivën e zhvillimit ekonomik të Shqipërisë.