Kryetari i Grupit Parlamentar të Partisë Socialiste, Taulant Balla, ka reaguar lidhur me protestën e zhvilluar sot në zonën e Zvërnecit kundër projektit për ndërtimin e një resorti turistik. Përmes një postimi në rrjetet sociale, Balla ka ndarë pamje të automjeteve me targa serbe, duke hedhur dyshime mbi origjinën e pjesëmarrësve në këtë tubim.
“Ja dhe ata që e duan më shumë sesa ne Shqipërinë, i sollën protestuesit në Zvërnec. Po këto makinat me targa serbe dhe serbët pse duhet të jenë në protestë për Zvërnecin?”, ka shkruar Balla.
Ndërkohë, aktivistët dhe qytetarët u mblodhën në zonën e Porto Novos dhe plazhit të Dalanit në Vlorë për të kundërshtuar ndërtimet e planifikuara. Me pankarta si “Larg duart nga Narta” dhe flamuj kuqezi, protestuesit marshuan përgjatë bregut të detit, duke kërkuar mbrojtjen e natyrës dhe rëndësinë e zonës për komunitetin lokal. Kjo protestë pason një sërë tubimesh që kanë nisur prej 7 ditësh në Tiranë dhe në qytete të tjera të vendit lidhur me të njëjtën çështje.
Kjo është pjesë e debateve të vazhdueshme mbi zhvillimet në zonat e mbrojtura, ku më herët edhe Kryeministri Edi Rama ka pretenduar se protestat nxiten nga faktorë të jashtëm, duke përmendur Greqinë si palë të interesuar.