Për të shtatën ditë me radhë, qytetarë dhe përfaqësues të shoqërisë civile janë mbledhur në Tiranë për të protestuar kundër projektit investues në zonën e Zvërnecit. Protestuesit marshuan nga sheshi “Skënderbej” përgjatë bulevardit “Dëshmorët e Kombit” dhe u grumbulluan para godinës së Kryeministrisë.
Ndër kërkesat kryesore të pjesëmarrësve janë anulimi i projektit, mbrojtja e pasurive kombëtare, rritja e transparencës dhe dorëheqja e qeverisë. Pjesëmarrësit theksuan se lëvizja është qytetare dhe nuk përfaqëson forca politike, ndërsa gjatë marshimit u shpalosën pankarta të shumta me thirrje për mbrojtjen e natyrës.
Vala e protestave është shtrirë edhe në qytete të tjera të vendit, si në Shkodër, Korçë dhe Elbasan. Paraditen e 6 qershorit, një protestë u organizua edhe në vetë zonën e Zvërnecit.
Kauza ka gjetur mbështetje edhe jashtë kufijve të Shqipërisë. Në Athinë, përpara sheshit Sintagma, u organizua një tubim ku përveç shqiptarëve morën pjesë edhe qytetarë grekë e palestinezë. Protesta në mbështetje të kësaj lëvizjeje janë raportuar gjithashtu në Itali, Gjermani dhe në Uashington DC të Shteteve të Bashkuara të Amerikës.
Përditësime
Në ditën e shtatë të protestës kundër investimit në Zvërnec, organizatorët kanë formalizuar pesë kërkesa për qeverinë: dorëheqjen e kabinetit, shfuqizimin e statusit të Investitorëve Strategjikë, anulimin e Paketës së Maleve, si dhe shfuqizimin e ndryshimeve në Ligjin për Zonat e Mbrojtura dhe atë për Trashëgiminë Kulturore. Valës së pakënaqësisë i është bashkuar edhe diaspora, me tubime të organizuara në New York, duke e zgjeruar lëvizjen përtej kufijve.