Protestat kundër projektit në Zvërnec kanë vijuar për ditën e nëntë radhazi, me një marshim të nisur të hënën rreth orës 18:00 nga sheshi Skënderbej drejt ndërtesës së Kryeministrisë. Gjatë tubimit, protestuesit kanë artikuluar kërkesa për dorëheqjen e kryeministrit Edi Rama dhe kanë shpalosur një manifest për një qeveri transitore dhe vetting për politikanët.
Në protestë janë bashkuar edhe studentë, të cilët mbanin parrulla me mbishkrimin: “Nuk i ke larë akoma hesapet me studentët”. Gjatë marshimit, pjesëmarrësit kanë thirrur slogane kundër qeverisë dhe partive politike në përgjithësi. Në nisje të tubimit janë regjistruar tensione mes qytetarëve dhe përfaqësuesve të Forumit Rinor të Partisë Demokratike (FRPD), pasi protestuesit kanë kërkuar largimin e tyre për të ruajtur karakterin qytetar të protestës. Po ashtu, një prej protestuesve ka akuzuar deputetin e Lëvizjes Bashkë, Redi Muçi, për përpjekje për të ndikuar në mbarëvajtjen e tubimit.
Organizatorët kanë ndryshuar formatin e protestës, duke bërë të ditur se në podiumin e ngritur nuk do të ketë më fjalime të rastësishme. Përfaqësimi do të kufizohet në pesë personalitete të përzgjedhura nga grupi nismëtar, të cilët do të vijnë nga fusha të ndryshme të shoqërisë, si shkenca dhe arsimi. Ndërkohë, protestuesit kanë mbajtur qëndrim kritik edhe ndaj subjekteve politike, përfshirë Partinë Demokratike, për paqëndrueshmërinë e tyre lidhur me investimin në Zvërnec.