Pasditen e kësaj të diele, protestuesit kanë vijuar mobilizimin për ditën e 15-të radhazi në Tiranë. Grumbullimi filloi në orën 18:00 në Sheshin Skënderbej, për të vazhduar me një marshim përgjatë bulevardit drejt godinës së Kryeministrisë.
Sikurse në ditët e mëparshme, pjesëmarrësit mbajtën fjalime para institucionit të qeverisë, ndërsa u intonua himni kombëtar. Gjatë tubimit, aktivisti Alben Kola u bëri thirrje protestuesve që të shmangin përdorimin e flakadanëve për të garantuar sigurinë e të pranishmëve, veçanërisht grave dhe fëmijëve. Një pjesë e folësve shprehën qëndrime për nevojën e ndryshimeve politike, duke kërkuar dorëheqjen e qeverisë dhe mbrojtjen e interesave qytetare përballë projekteve të investimeve strategjike.
Kërkesat kryesore të protestuesve mbeten:
• Dorëheqja e qeverisë.
• Rishikimi i statusit të investitorëve strategjikë.
• Anulimi i ndryshimeve ligjore që cenojnë zonat e mbrojtura.
• Kundërshtimi i projektit të investimit në zonën e Zvërnecit.
Në protestë morën pjesë edhe shtetas shqiptarë të kthyer nga diaspora, të cilët ndanë përvojat e tyre dhe nxitën pjesëmarrësit që të vijojnë kërkesat për një të ardhme më të mirë në vend. Sipas organizatorëve, tubimet do të vazhdojnë deri në plotësimin e kërkesave të parashtruara.
Përditësime
Protesta qytetare në Tiranë ka hyrë në ditën e saj të 15-të, me pjesëmarrjen e qindra qytetarëve nga të gjitha rrethet e vendit dhe grupeve të diasporës. Organizatorët kanë njoftuar se tubimi i radhës do të mbahet më 14 qershor.