Për të 12-ën ditë radhazi, mijëra qytetarë u mblodhën para godinës së Kryeministrisë në Tiranë për të shprehur pakënaqësinë ndaj qeverisë. Pas tubimit, pjesëmarrësit nisën një marshim nëpër rrugët e kryeqytetit, duke kaluar në akse si zona e 9-katësheve, rruga e Kavajës, 21-Dhjetori, Zogu i Zi, ish-Dogana dhe zona e Astirit.
Gjatë marshimit, protestuesit mbajtën flamuj kuq e zi dhe pankarta, duke përsëritur thirrje për dorëheqjen e kryeministrit Edi Rama dhe anëtarëve të kabinetit qeveritar. Sloganet kryesore përfshinin thirrje si "Rama n’burg" dhe "Berisha n’burg", si dhe moton "Shqipëri e re". Protesta, e cila fillimisht nisi si reagim ndaj projekteve të ndërtimit në Zvërnec, është zgjeruar duke kërkuar ndalimin e ndërtimeve në zona të mbrojtura.
Organizatorët e protestës theksuan se lëvizja ka gjetur mbështetje edhe në qytete të tjera dhe në diasporë. Ndërkohë, vëmendja është përqendruar te tubimi i planifikuar për ditën e nesërme. Ky zhvillim vjen pasi kryeministri Edi Rama njoftoi mbajtjen e një tubimi në Sheshin Italia në të njëjtin orar me protestën. Pjesëmarrësit bënë apel ndaj punonjësve të administratës publike që të mos marrin pjesë në atë që e kanë cilësuar si "antimiting" i qeverisë, duke u bërë thirrje qytetarëve për një mobilizim masiv për të kundërshtuar këtë nismë.
Përditësime
Në ditën e 12-të të protestës, mijëra qytetarë marshuan nga sheshi Skënderbej drejt Kryeministrisë, zhvillime të cilat u pasqyruan drejtpërdrejt nga agjencia Reuters. Ndërkohë, emigrantët shqiptarë në Gjenovë organizuan një tubim në mbështetje të kauzës. Organizatorët njoftuan se protesta e radhës do të mbahet më 13 qershor.