Pas tre orësh tubim para godinës së Kryeministrisë, mijëra protestues kanë nisur marshimin në akset kryesore të Tiranës. Kjo protestë shënon ditën e 15-të radhazi të mobilizimit qytetar, ku marrin pjesë banorë nga qytete të ndryshme të Shqipërisë dhe përfaqësues të diasporës.
Gjatë marshimit, pjesëmarrësit mbanin flamuj kombëtarë dhe pankarta, duke thirrur slogane kundër qeverisë dhe klasës politike, si "Revolucion", "Rama në burg, Berisha në burg", "Ju erdhi fundi" dhe "Shqipëria nuk shitet". Përkundër tensionit të thirrjeve, marshimi është zhvilluar pa incidente.
Lëvizja, e cila nisi fillimisht si reagim ndaj projekteve të investimit në Zvërnec dhe Sazan, ka evoluar në një qëndresë me kërkesa për dorëheqjen e kryeministrit Edi Rama dhe largimin e kabinetit qeveritar. Organizatorët kanë deklaruar se protestat do të vijojnë në ditët në vijim, ndërsa itinerari i marshimeve ndryshon çdo mbrëmje për të mbuluar pjesë të ndryshme të kryeqytetit.
Përditësime
Pas marshimit përgjatë bulevardeve kryesore të Tiranës, protestuesit janë rikthyer para godinës së Kryeministrisë. Kjo shënon ditën e 16-të të tubimeve të vazhdueshme.