Kreu i grupit parlamentar të Partisë Socialiste, Taulant Balla, ka publikuar një video në rrjetet sociale, përmes së cilës ka komentuar pjesëmarrjen e zyrtarit të Lëvizjes Vetëvendosje nga Kosova, ish-deputetit Egzon Azemi, në protestat kundër qeverisë në Tiranë.
Në reagimin e tij, Balla e cilësoi Azemin si mik të Besnik Mujecit, aktivistit të LVV-së të arrestuar në verën e vitit 2023 në kryeqytetin shqiptar nën akuzën për shitje të lëndëve narkotike. Duke iu referuar protestave, Balla u shpreh: "Kur unë flas për sorra inkubatorësh të urrejtjes nga Prishtina dhe Tetova, të cilët maskohen si shqiponja diaspore, e kam fjalën për tipa si këta në video. Normal janë kundër Edi Ramës. Edhe kundër meje, pse jo. Sepse i kemi arrestuar me 11 mijë doza drogë".
Nga ana tjetër, Egzon Azemi ndau në rrjetet sociale pamje nga protesta, duke shprehur përkrahjen e tij për kauzën e protestuesve. Sipas Azemit, pjesëmarrja në këtë thirrje ka qenë e natyrshme, duke theksuar se: "Shqipëria është atdheu i secilit shqiptar dhe kur tentohet të falet e të shitet, nuk do të heshtim kurrë".
Protestat në fjalë, të cilat po zhvillohen prej më shumë se 35 ditësh, janë përqendruar ndër të tjera në kundërshtimin e projektit për zonën e Zvërnecit dhe kërkesën për dorëheqjen e kryeministrit Edi Rama.