Klevis Balliu, deputet i Partisë Demokratike dhe nënkryetar i Komisionit të Punëve të Brendshme në Kuvend, ka reaguar ashpër pas zbulimit se drejtori i burgut të Rrogozhinës ka mbjellë rreth 4000 rrënjë kanabis në magazinë, ndërkohë që të rinj 18-20 vjeç janë arrestuar për dy cigare hashash.
Balliu e ka cilësuar këtë ngjarje si një goditje të rëndë për shtetin ligjor. Ai deklaroi se “ky nuk është një rast i izoluar, por një model i përsëritur që tregon se institucionet e shtetit janë në shërbim të interesave kriminale nën qeverisjen e Edi Ramës”.
Deputeti shtoi se “për sa kohë pushteti drejtohet nga një qeveri e lidhur me krimin, nuk mund të ketë zhvillim ekonomik dhe as integrim europian për Shqipërinë”.
Balliu bëri thirrje që qytetarët të bashkohen në protestën e 22 marsit, në orën 18:00, për të shprehur kundërshtimin ndaj këtij pushteti të degraduar dhe të inkriminuar.