Skuadra e Ballkanit ka finalizuar transferimin e qendërsulmuesit Dijar Nikqi, duke shtuar një tjetër emër në radhët e veta për sezonin e ri. Njoftimi është bërë i ditur përmes faqeve zyrtare të klubit, ku 21-vjeçari është prezantuar si përforcimi më i ri i ekipit.
Dijar Nikqi ka një karrierë të mëhershme në disa klube të njohura në futbollin shqiptar. Përpara se t'i bashkohej Ballkanit, ai ka qenë pjesë e skuadrave të Tiranës, Teutës, Vorës, si dhe të rinjve të Laçit. Në janar të vitit 2025, ai u bë pjesë e Lirisë së Prizrenit, klub ku aktivizohej deri para këtij transferimi. Përveç karrierës në nivel klubesh, Nikqi ka përfaqësuar gjithashtu ngjyrat e Shqipërisë në nivelin U21.
Klubi nga Suhareka ka deklaruar se ky afrim është pjesë e strategjisë për përforcimin e skuadrës në synimin për titullin kampion. Krahas transferimit të Nikçit, drejtuesit e Ballkanit kanë bërë të ditur se kanë realizuar edhe lëvizje të tjera në organikën e ekipit, duke liruar disa lojtarë të tjerë.
Ndërkohë, skuadra po përgatitet për ndeshjen e kthimit në garat evropiane, ku do të kërkojë përmbysjen e rezultatit ndaj ekipit irlandez Bohemians, pas humbjes së pësuar në takimin e parë të javës së shkuar.