Skuadra e Ballkanit e ka mbyllur rrugëtimin në garat evropiane pasi u mposht nga klubi irlandez Bohemians në raundin e dytë kualifikues të Conference League. Ndeshja e zhvilluar mbrëmë në stadiumin Fadil Vokrri në Prishtinë përfundoi me rezultatin 3:2 në kohën e rregullt, duke barazuar rezultatin e përgjithshëm të dy ndeshjeve në 4:4, pasi në ndeshjen e parë në Dublin, Bohemians kishte fituar me rezultat 2:1.
Në kohën e rregullt, Ballkani tregoi lojë cilësore duke arritur të kalojë në epërsi në minutën e 10-të me anë të Valentin Serebe. Skuadra irlandeze barazoi përkohësisht me një penallti të realizuar nga James-Taylor në minutën e 20-të. Në pjesën e dytë, ekipi nga Theranda riktheu epërsinë me Giovanni në minutën e 50-të, pas asistimit të Serebe, ndërsa në minutën e 58-të, Toni Domgjoni shënoi një gol nga distanca për rezultatin 3-1. Megjithatë, në minutën e 88-të, Hickey realizoi për mysafirët, duke e çuar sfidën në vazhdime.
Pas dy pjesëve shtesë prej 15 minutash, ku nuk u shënua asnjë gol, fituesi u përcaktua përmes ekzekutimit të penalltive. Për Ballkanin shënuan Ismajlgeci, Berisha, Diene dhe Dosso, ndërsa Bajram Jashanica goditi shtyllën. Futbollistët e Bohemians – Whelan, Devoy, Byrne, Rooney dhe Flores – realizuan të gjitha penalltitë, duke siguruar kualifikimin për ekipin e tyre në rrethin e tretë.