Skuadra e Ballkanit ka siguruar kualifikimin për në raundin e dytë të Ligës së Konferencës, pasi mposhti ekipin uellsian Connah’s Quay Nomads me rezultatin 3-2 në stadiumin "Fadil Vokrri".
Takimi nisi në favor të kampionëve të Kosovës, të cilët kaluan në epërsi në minutën e 20-të përmes kapitenit Edvin Kuç. Me këtë rezultat, skuadrat shkuan në pushimin e ndeshjes. Në pjesën e dytë, vendasit thelluan avantazhin me dy gola të shpejtë: Giovanni Ribeiro shënoi në minutën e 49-të, ndërsa Valentin Serebe realizoi golin e tretë në minutën e 57-të, pas asistimit të Ribeiros.
Në minutat në vijim, ritmi i lojës ndryshoi dhe skuadra uellsiane ngushtoi diferencën përmes një penalltie të realizuar nga Max Woodcock në minutën e 69-të. Vetëm shtatë minuta më vonë, në minutën e 76-të, Hussein Mehasseb shënoi golin e dytë për mysafirët, duke e bërë fundin e ndeshjes dramatik. Megjithatë, Ballkani arriti të administrojë rezultatin deri në vërshëllimën përfundimtare.
Në raundin e dytë kualifikues, kampionët e Kosovës do të përballen me fituesin e çiftit që përbëhet nga ekipi irlandez Bohemian dhe skuadra nga Gjibraltari, St Joseph’s.