Skuadra e Ballkanit ka regjistruar një barazim pa gola, 0-0, në ndeshjen e parë të raundit të parë kualifikues të Ligës së Konferencës kundër skuadrës uellsiane Connah's Quay Nomads. Gjatë pjesës më të madhe të takimit, ekipi nga Suhareka mbajti kontrollin e lojës dhe tregoi iniciativë, ndërsa vendasit u përqendruan në organizimin mbrojtës dhe kundërsulmet.
Raste për shënim patën lojtarët si Albert Diene, Almedin Klinaku, Giovanni dhe Anel Sabanadzovic, por asnjëri prej tyre nuk arriti të zhbllokonte rezultatin. Në pjesën e dytë, trajneri i Ballkanit ndërhyri në formacion duke aktivizuar lojtarë të tjerë, ndërkohë që në minutat e fundit të sfidës, vendasit me lojtarë si Michael Stone dhe Darren Stephenson shtuan presionin, por mbrojtja e udhëhequr nga portieri Artan Golubovic reagoi me sukses duke mbajtur portën të paprekur.
Pas këtij rezultati, vendimi për kualifikimin në raundin tjetër do të merret në sfidën e kthimit, e cila është parashikuar të zhvillohet pas një jave në stadiumin Fadil Vokrri në Prishtinë.