Ish-Presidenti i Republikës, Bamir Topi, ka analizuar zhvillimet e fundit, duke theksuar se protestat aktuale përfaqësojnë një revoltë kundër klasës politike në tërësi. Sipas tij, këto protesta nuk janë të orientuara nga forca politike, por përbëjnë një reagim ndaj akumulimit të pakënaqësive ndër vite.
Sipas Topit, zanafilla e kësaj lëvizjeje qytetare është ngjarja në Zvërnec, ku një qytetar u tërhoq zvarrë nga një polici private, ndërsa Policia e Shtetit mbeti indiferente. Ai akuzoi Policinë e Shtetit se vepron si instrument politik në shërbim të kryeministrit.
Ish-kreu i shtetit theksoi se baza e sistemit aktual politik rrjedh nga ndryshimet kushtetuese të vitit 2008, të cilat sipas tij ishin rezultat i një marrëveshjeje mes Edi Ramës dhe Sali Berishës. Ai shtoi se kjo marrëveshje ka sjellë autokracinë që karakterizon politikën shqiptare dhe ka shkatërruar shtetin. Bamir Topi vlerësoi pjesëmarrjen e brezit të ri dhe të intelektualëve në këtë protestë, duke paralajmëruar se lëvizja duhet të ruajë pavarësinë e saj për të shmangur ndërhyrjet politike.