Deputetja e qarkut Shkodër, Marjana Koçeku, ka publikuar një letër të hapur drejtuar kryeministrit Edi Rama, në të cilën kërkon largimin e tij nga detyra. Kjo lëvizje pason njoftimin e saj për largimin nga grupi parlamentar i Partisë Socialiste dhe bashkimin me protestat që zhvillohen prej 24 ditësh përpara selisë së qeverisë.
Në letrën e saj, Koçeku shprehet se qeverisja aktuale është shkëputur nga realiteti dhe nuk pranon mendime ndryshe. Ajo e akuzon kryeministrin se, në vend që të përballet me kërkesat e qytetarëve, po përpiqet t’i denigrojë ata. Deputetja thekson se protestat nuk janë kundër SHBA-së, por kundër një sistemi të brendshëm të ndërtuar mbi frikën dhe servilizmin.
Komunikimi me Kryeministrin
Në shkrimin e saj, Koçeku zbuloi pjesë nga komunikimi i fundit privat me kryeministrin Edi Rama. Sipas deputetes, kreu i qeverisë e ka paralajmëruar se largimi nga partia do ta linte atë të izoluar politikisht. Koçeku u shpreh se nuk ndihet e frikësuar nga ky paralajmërim, duke theksuar se e ka “kaluar gardhin” dhe nuk ka kthim prapa.
Kjo është dalja e parë publike e deputetes në rolin e saj si e pavarur, pas konfirmimit nga kreu i grupit parlamentar socialist, Taulant Balla, se ajo nuk iu ishte përgjigjur thirrjeve për komunikim pas dorëheqjes nga grupi i PS-së.