Banka e Shqipërisë bleu 1 miliard e 27 milionë euro në tregun valutor gjatë vitit 2025. Kjo shifër përfaqëson 3.8% të Prodhimit të Brendshëm Bruto dhe përfshin 729.1 milionë euro për frenimin e forcimit të kursit të këmbimit si dhe 297.9 milionë euro për rritjen e rezervave valutore.
Ndërhyrjet në tregun valutor filluan në vitin 2024, pavarësisht këshillave të Fondit Monetar Ndërkombëtar për t'i shmangur ato. Atë vit u blenë 933 milionë euro në total, përfshirë 649 milionë euro për kursin e këmbimit dhe 283.8 milionë euro për rezerva. Në 2025, blerjet rifilluan në maj dhe kulmuan në korrik me 236 milionë euro brenda një muaji.
Leku shqiptar e nisi vitin 2025 në nivelin 98.3 lekë për euro dhe e mbylli në 96.8 lekë për euro, duke u forcua me 1.5%. Në muajt e parë të 2026-s, euro kushton 95.8 lekë, forcim i mëtejshëm prej 1%.
Sipas teorisë ekonomike kryesore, blerjet e tilla duhet të shkaktonin zhvlerësim të brendshëm të lekut, pra inflacion. Megjithatë, inflacioni mbetet i ulët sipas Indeksit të Çmimeve të Mallrave të Konsumit të matur nga Instituti i Statistikave.