Banka e Shqipërisë në raportin vjetor konstaton se forcimi i lekut ndaj euros në vitet e fundit nuk është zhvillim i përkohshëm, por fenomen me bazë strukturore. Ky trend buron nga përmirësimi i ekonomisë dhe rritja e hyrjeve valutore në vend.
Rritja e të ardhurave nga turizmi ka luajtur rol kryesor, duke dyfishuar eksportet e shërbimeve dhe shtuar ofertën e euros në tregun brendshëm. Përveç kësaj, remitancat dhe investimet e huaja kanë rritur hyrjet valutore dhe përmirësuar bilancin e pagesave.
Sipas Bankës së Shqipërisë, ky forcim reflekton përmirësimin e bilancit të shkëmbimeve ekonomike, tregtare dhe financiare me jashtë. Në kushtet e kursit të lirë të këmbimit, rritja e ofertës së valutës ka çuar në forcimin e lekut. Gjithashtu, ky zhvillim lidhet me rritjen e besimit në ekonominë vendase, uljen e perceptimit të rrezikut financiar dhe preferencën për kursime në monedhën kombëtare.
Banka e Shqipërisë thekson se forcimi pasqyron përmirësimet strukturore, si rritja e produktivitetit dhe reduktimi i primeve të rrezikut në tregun financiar. Ky fenomen mbetet i qëndrueshëm për sa kohë që këta faktorë vijojnë të jenë të pranishëm.
Megjithatë, ky zhvillim ka efekte të ndryshme në ekonomi. Ai ndihmon në uljen e presioneve inflacioniste dhe rrit fuqinë blerëse të konsumatorëve, por sfidon konkurrueshmërinë e eksporteve shqiptare. Në këtë kontekst, Banka e Shqipërisë vlerëson se kursi i këmbimit kërkon monitorim të vazhdueshëm, në një ekonomi gjithnjë e më të ekspozuar ndaj faktorëve të jashtëm.