Kursi i këmbimit mes euros dhe lekut ka shënuar një rënie të mëtejshme, duke prekur nivelin më të ulët të regjistruar ndonjëherë. Sipas të dhënave zyrtare, euro u këmbye këtë të hënë me 95.19 lekë, ndërsa vëmendja e tregut është orientuar tashmë drejt pragut të 95 lekëve.
Sipas agjentëve të tregut, rënia e monedhës europiane nxitet nga oferta e lartë valutore, e cila tejkalon kërkesën, pavarësisht ndërhyrjeve të vazhdueshme të Bankës së Shqipërisë. Pritshmëritë për rritjen e ofertës gjatë sezonit veror si pasojë e turizmit sugjerojnë se kursi mund të vazhdojë të mbetet nën presion.
Kjo situatë ka krijuar një dilemë për Bankën Qendrore. Me arritjen e inflacionit në nivelin 3% në muajin maj, që përkon me objektivin e institucionit, argumenti për ndërhyrje në treg për stabilitet çmimesh mund të dobësohet. Ndërsa forcimi i lekut ndihmon në kontrollin e inflacionit dhe zbutjen e çmimeve të importit, ai shkakton sfida për sektorin e eksporteve dhe atë të turizmit, pasi ul të ardhurat në monedhën vendase dhe mund të ndikojë në konkurrueshmërinë e këtyre bizneseve.