Kursi i këmbimit të euros me lekun e ka mbyllur javën në rënie, duke prekur një minimum të ri historik. Sipas të dhënave zyrtare të Bankës së Shqipërisë, monedha europiane u këmbye me 95.34 lekë, niveli më i ulët i regjistruar ndonjëherë.
Që nga fillimi i vitit euro është zhvlerësuar me 1.5%, ndërsa me bazë vjetore rënia ka arritur 3.3%. Tendenca lidhet me rritjen e flukseve valutore hyrëse, sidomos nga turizmi. Oferta e valutës në treg është e bollshme, ndërsa kërkesa nuk shfaq luhatje të mëdha.
Banka e Shqipërisë vazhdon të blejë valutë për të frenuar forcimin e lekut. Vitin e kaluar ajo bleu 1.027 miliardë euro, një sasi 10% më e lartë se një vit më parë. Në periudhën 2024-2025 blerjet totale arritën afërsisht dy miliardë euro. Për vitin aktual banka ka planifikuar të blejë përmes ankandeve 330-450 milionë euro me qëllim rritjen e rezervës valutore.
Blerjet e këtij viti vazhdojnë, por shifrat e sakta nuk janë bërë ende publike.