Kursi i këmbimit të euros me lekun vijon tendencën rënëse, duke prekur shifra të paprecedenta. Sipas të dhënave zyrtare të Bankës së Shqipërisë, euro u këmbye të martën me 92.44 lekë, niveli më i ulët i regjistruar ndonjëherë. Megjithatë, në tregun e lirë, përfshirë bankat e nivelit të dytë, monedha evropiane po blihet në vlera dukshëm më të ulëta, duke zbritur deri në 89.4 lekë në disa raste. Që nga fillimi i vitit, kursi euro-lek ka shënuar një rënie prej 4.5%.
Ekspertët dhe Banka e Shqipërisë e lidhin këtë zhvlerësim me ofertën e lartë të valutës, e cila është nxitur nga sezoni i lartë turistik dhe remitancat. Për tremujorin e parë të vitit, investimet e huaja direkte arritën në 404 milionë euro, duke shënuar një rekord historik, ndërsa deficiti i llogarisë korrente u tkurr me 28%. Vëllimi i tregtimit valutor në tremujorin e dytë arriti në gati 4.5 miliardë euro, një rritje prej 30% krahasuar me të njëjtën periudhë të një viti më parë.
Ndërkohë, sektori i eksporteve ka shprehur shqetësim mbi ndikimin negativ të kësaj rënieje në të ardhurat e tyre dhe pritet t'i drejtohet qeverisë me kërkesa zyrtare. Nga ana tjetër, Banka e Shqipërisë po ndërhyn në treg duke blerë valutë për të zbutur këtë tendencë. Vetëm në tremujorin e parë janë blerë 140 milionë euro, ndërsa planifikohet që deri në fund të vitit shifra totale e ndërhyrjeve të variojë nga 330 në 450 milionë euro për të rritur rezervën valutore.
Përditësime
Monedha evropiane ka thelluar rënien me 6.31% gjatë tremujorit të fundit, duke zbritur nga 95.42 lekë në 89.4 lekë. Efekti i zhvlerësimit është shtrirë edhe te bizneset që operojnë me dollarë amerikanë, ku kursi ka rënë në 79.23 lekë, ndërsa paundi britanik është këmbyer nën 106 lekë. Për të rritur rezervën valutore, Banka e Shqipërisë ka tërhequr 95.5 milionë euro nga tregu përmes ndërhyrjeve të drejtpërdrejta.