Banka e Shqipërisë publikoi raportin e Politikës Monetare për tremujorin e tretë të vitit 2026, duke konfirmuar se rritja e inflacionit gjatë muajve të fundit është një zhvillim i përkohshëm. Sipas të dhënave, inflacioni mesatar u rrit në 3% gjatë tremujorit të dytë, nga 2.5% në tremujorin e parë, i ndikuar kryesisht nga shtrenjtimi i karburanteve në tregjet botërore për shkak të tensioneve në Lindjen e Mesme dhe nga rritja e çmimeve të shërbimeve të brendshme, sidomos në turizëm dhe transport.
Erald Themeli, drejtor i Departamentit të Politikës Monetare pranë Bankës së Shqipërisë, deklaroi se pritet një nivel inflacioni disi më i lartë se objektivi në terma afatshkurtër për vitin 2026 dhe dy tremujorët e parë të vitit 2027, por pa shmangie të ndjeshme. Ndërkohë, mbiçmimi i Lekut ka shërbyer si një faktor amortizues për presionet inflacioniste të importuara. Banka e Shqipërisë thekson se, përveç qirave, inflacioni i brendshëm mbetet brenda objektivit të stabilitetit të çmimeve.
Sa i përket rritjes ekonomike, institucioni konfirmon vijimin e trendit pozitiv. Në tremujorin e parë, ekonomia u zgjerua me 3.7%, mbështetur nga rritja e konsumit, investimet dhe të ardhurat nga turizmi. Në tregun e punës, papunësia rezultoi 8.4%, ndërsa pagat në sektorin privat jobujqësor shënuan një rritje prej 11.5%, të ndikuara nga rritja e pagës minimale në janar.
Megjithatë, Banka e Shqipërisë vlerëson se pasiguritë mbeten të larta për shkak të zhvillimeve gjeopolitike dhe luhatjeve në tregjet ndërkombëtare të energjisë. Një përshkallëzim i këtyre tensioneve mund të ndikojë negativisht në perspektivën ekonomike, ndërsa balanca e rreziqeve mbetet e zhvendosur në kahun rritës për inflacionin dhe në kahun rënës për aktivitetin ekonomik.