Banka e Shqipërisë ka paralajmëruar se tensionet gjeopolitike në Lindjen e Mesme rrezikojnë të ndikojnë negativisht në ekonominë shqiptare. Sipas raportit të politikës monetare për tremujorin e parë të 2026, kjo situatë mund të shkaktojë goditje të ofertës të ngjashme me atë pas konfliktit në Ukrainë, duke ushtruar presion për rritje të çmimeve dhe frenim të rritjes ekonomike.
Erald Themeli, drejtor i Departamentit të Politikës Monetare, deklaroi se "jemi përballë një realiteti të ri". Ai vuri në dukje se, nëse tensionet zgjaten, do të rritet inflacioni dhe do të nevojitet shtrëngim i politikës monetare, duke çuar në norma më të larta interesi për kreditë dhe këste më të mëdha.
Inflacioni i çmimeve të konsumit luhatet në nivele të ulëta: 2.2% në tremujorin e katërt të 2025 dhe 2.4% në dy muajt e parë të 2026. Presionet e brendshme vijojnë nga rritja e kërkesës, pagave dhe kostove të prodhimit. Megjithatë, shtrenjtimi i naftës, me peshë 3.5% në shportën e konsumit familjar dhe rreth 60% të buxhetit energjetik, godet biznese dhe familje.
Ekonomia ka hyrë në 2026 me rritje të punësimit, pagave dhe konsumin, me projeksione për rritje 3.5-4%. Këshilli Mbikëqyrës mbajti normën bazë të interesit në 2.5%. Vendimmarrja e radhës parashikohet në fillim të majit, pas vëzhgimit të zhvillimeve në prill.