Banka e Shqipërisë ka licensuar Jet Bank më 25 mars 2026, duke i dhënë mundësi kësaj të operojë me kapacitete të plota në tregun shqiptar. Ky hap shënon përfundimin e një procesi rigoroz vlerësimi, në përputhje me standardet rregullatore vendase dhe ndërkombëtare për siguri, transparencë dhe stabilitet financiar.
Jet Bank, banka e parë 100% digjitale në Shqipëri, do të hyjë në një fazë testimi paraprak. Gjatë saj, aplikacioni do të jetë i aksesueshëm për një grup të përzgjedhur përdoruesish, për të mbledhur feedback mbi përvojën e përdoruesit, funksionalitetet dhe performancën në kushte reale.
CEO e Jet Bank, Fatbardha Rino, deklaroi: «Pas licensimit, fokusi ynë është të sigurojmë që çdo element i eksperiencës së klientit të jetë i thjeshtë, funksional dhe i besueshëm. Për këtë arsye, do të fillojmë me një fazë testimi të kontrolluar, përpara se të prezantojmë aplikacionin për publikun e gjerë».
Grupi i shërbimeve dhe produkteve do të ndërtohet hap pas hapi, bazuar në kërkesat dhe feedback-un e klientëve gjatë testimeve. Bazuar në rezultatet, Jet Bank do të përcaktojë datën e lançimit të plotë në treg.
Jet Bank ofron një përvojë bankare tërësisht digjitale, të ndërtuar mbi parime thjeshtësi, shpejtësie dhe transparence, duke përdorur teknologji moderne dhe procese të thjeshtuara për shërbime të aksesueshme në çdo kohë, në përputhje me standardet rregullatore dhe të sigurisë.