Jet Bank mori pjesë në edicionin e dytë të forumit kombëtar “Fit for the Future with AI”, të organizuar nga Vodafone Albania. Kjo pjesëmarrje konfirmon ambicien për ta shndërruar inteligjencën artificiale nga koncept në produktivitet real në institucionet financiare shqiptare.
Në panelin “Ekosistemi i IA në Ekonomi & Inovacion”, drejtoresha ekzekutive Fatbardha Rino deklaroi se për një bankë 100% dixhitale, AI nuk është thjesht një trend, por shtyllë themelore. Ajo përdoret për ndërtimin e shërbimeve, kontrollin e proceseve të riskut, kundërmarrjen ndaj pastrimit të parave, identifikimin e klientëve dhe sigurinë e të dhënave kundër mashtrimesh apo krimeve financiare.
"Në një kohë të shpejtë pas licencimit, ne do të futemi në fazë testimi, ku aplikacionin tonë do ta bëjmë publik për një grup të përzgjedhur miqsh & familjarësh, për të marrë përshtypjet e tyre të para. Pas kësaj dhe në varësi të rezultateve, do të vendosim momentin e hyrjes në treg me portofolin tonë të produkteve", - tha Rino.
Ajo sqaroi se portofoli do të zhvillohet me faza të ndryshme, duke u përshtatur gradualisht me nevojat reale të përdoruesve.
Pjesëmarrja nënvizon se Jet Bank e sheh transformimin teknologjik si moment kur infrastruktura dixhitale dhe besimi konsiderohen kapitale strategjike kombëtare. Banka pozicionohet si aktor që ndërton mbi këto baza për modele të reja bankimi: më të shpejta, më inteligjente dhe të dizajnuara për një ekonomi në ritmin e inteligjencës artificiale.