Banorët e qytetit të Durrësit janë mbledhur në një protestë para Bashkisë për të kundërshtuar vendosjen e sistemit të parkimit me pagesë në rrugët dhe hapësirat publike. Protestuesit, të mbështetur nga dega lokale e Partisë Demokratike, vlerësojnë se vendimi i miratuar nga Këshilli Bashkiak dy vite më parë do të sjellë kosto të shtuara financiare.
Sipas protestuesve, mungesa e konsultimeve publike dhe paqartësitë mbi zbatimin dhe monitorimin e këtij sistemi janë shqetësimet kryesore. Aktualisht, Bashkia ka nisur vijëzimin me ngjyrë blu të rrugëve, duke shënuar fazën përfundimtare të zbatimit të projektit.
Skema e tarifimit
Sipas projektit të miratuar, qyteti është ndarë në dy zona:
- Zona A: Përfshin qendrën e qytetit dhe akse me aktivitet të lartë tregtar si bulevardet "Epidamn" e "Dyrrah", si dhe rrugët "Taulantia" e "Currilat", me tarifë 100 lekë për orë.
- Zona B: Përfshin akset si "Aleksandër Goga", "Mujo Ulqinaku" dhe "Stefan Kaçulini", me tarifë 40 lekë për orë.
Sipas planit të Bashkisë së Durrësit, tarifimi do të zbatohet nga e hëna në të premte. Gjatë sezonit turistik (1 qershor - 30 shtator), pagesa do të jetë në fuqi nga ora 08:00 deri në 20:00, ndërsa gjatë pjesës tjetër të vitit, fasha orare do të jetë nga ora 08:00 deri në 18:00.
Përditësime
Banorët e Durrësit po protestojnë kundër tarifës së re të parkimit prej 10,000 lekësh në muaj për kartën e rezidentit. Qytetarët e konsiderojnë koston vjetore prej 100,000 lekësh të papërballueshme, ndërsa theksojnë se transporti publik aktual mbetet i pamjaftueshëm për të zëvendësuar përdorimin e automjeteve private.