Klubi i Barcelona-s ka ndërmarrë hapa konkretë në tregun e transferimeve, duke dorëzuar një ofertë zyrtare prej 100 milionë eurosh për shërbimet e sulmuesit argjentinas Julian Alvarez. Sipas ekspertit të transferimeve, Fabrizio Romano, propozimi financiar nuk përfshin bonuse apo shkëmbim lojtarësh, duke shënuar një përpjekje të qartë të katalanasve për të forcuar repartin e sulmit pas afrimit të Anthony Gordon.
Qëndrimet e klubeve mbi këtë çështje janë kundërthënëse. Ndërsa raportimet konfirmojnë ofertën, burime pranë Atletico Madrid kanë deklaruar për mediet se nuk ka mbërritur asnjë propozim zyrtar, duke i cilësuar lajmet si të pasakta. Klubi madrilen mban një qëndrim të palëkundur, duke theksuar se Julian Alvarez nuk është në shitje dhe mbetet një pjesë kyçe e projektit të tyre për sezonin e ri.
Në anën tjetër, burime pranë situatës bëjnë të ditur se 26-vjeçari ka kërkuar zyrtarisht largimin nga klubi gjatë këtij afati kalimtar. Sulmuesi, i cili ka një kontratë me Atletico Madrid deri në vitin 2030, është bërë objektivi kryesor i Barcelona-s, ndërsa interesim për të kanë shfaqur edhe klube të tjera, si PSG.
Julian Alvarez u transferua te madrilenët në vitin 2024 nga Manchester City për shumën e 75 milionë eurove. Gjatë sezonit 2025/26, ai regjistroi 20 gola dhe 9 asistime në 49 ndeshje të zhvilluara në të gjitha kompeticionet. Pritet që negociatat të vazhdojnë, ndërsa Barcelona synon të arrijë marrëveshjen me klubin spanjoll.