Barcelona po intensifikon përpjekjet për të transferuar sulmuesin argjentinas Julian Alvarez nga Atletico Madrid. Klubi katalanas e sheh lojtarin si objektivin kryesor për repartin ofensiv gjatë afatit kalimtar të verës, sidomos pas largimit të pritshëm të Robert Lewandowski.
Eksperti i tregut të transferimeve Matteo Moretto ka deklaruar se drejtuesit e Barcelonës planifikojnë të kontaktojnë Atletico Madrid dhe agjentin e lojtarit. Atletico kërkon mbi 100 milionë euro, ndërsa Barcelona po shqyrton mundësinë e shkëmbimit të disa lojtarëve për të ulur koston e marrëveshjes.
Raportimet tregojnë se Ferran Torres është emri që përmendet më shpesh si pjesë e mundshme e shkëmbimit. Në të njëjtën kohë klubi monitoron edhe Joao Pedro, por prioriteti kryesor mbetet Alvarez. Sulmuesi argjentinas ndihet i lumtur te Atletico dhe është përshtatur mirë, megjithatë interesimi i Barcelonës mbetet i fortë dhe konkret.