Barcelona ka nisur përgatitjet për afatin kalimtar veror, duke identifikuar katër objektiva kryesorë për përforcimin e skuadrës, me prioritet në repartin ofensiv.
Pas një sezoni me luhatje dhe zhgënjime në garat evropiane, drejtuesit e klubit katalanas kërkojnë të rindërtojnë ekipin për të rikthyer dominimin.
Prioritet kryesor është pozita e sulmuesit qendror. Vedat Muriqi, sulmuesi kosovar që shkëlqen te Mallorca, konsiderohet alternativë ekonomike për Julián Álvarez, për shkak të kostos së lartë të këtij të fundit.
Performancat e tij të qëndrueshme dhe instinkti për gol e kanë bërë një nga emrat më të përfolur për një transferim të mundshëm në Camp Nou.
Përveç sulmuesit, synohet përforcimi në qendër të mbrojtjes me Alessandro Bastoni si objektiv kryesor. Në krahun e majtë kërkohet një anësor i ri për të zëvendësuar largimin e mundshëm të Marcus Rashford.
Një çështje tjetër e rëndësishme është vazhdimi i João Cancelo-s, i cili ka bindur me paraqitjet dhe pritet të jetë pjesë e planeve për sezonin e ardhshëm.
Interesimi për Muriqi mund të marrë formë konkrete në javët në vijim.