Gazment Bardhi, kryetar i grupit parlamentar të Partisë Demokratike, dhe deputetja Jorida Tabaku zhvilluan një takim në Senatin italian me Stefania Craxi, kryetare e grupit parlamentar të Forza Italia.
Takimi u zhvillua në vijim të vizitës zyrtare të deputetëve demokratë në Itali, më 21 prill.
Gjatë takimit, Bardhi theksoi se Italia ka qenë dhe mbetet një nga aleatet më të forta të Shqipërisë në rrugëtimin europian, si dhe një partnere e palëkundur në zhvillimin ekonomik dhe shoqëror.
Deputetët shprehën mirënjohje për këtë mbështetje dhe nënvizuan se përgjegjësia për të çuar Shqipërinë përpara u takon shqiptarëve.
Ata konfirmuan qëndrimin e Partisë Demokratike për të mbështetur çdo proces që afron Shqipërinë me Bashkimin Europian.
"Integrimi europian nuk është një slogan politik, por një proces që kërkon përkushtim real, reforma të thella dhe standarde të qëndrueshme demokratike", deklaroi Bardhi.
Ai shtoi se në Shqipëri po ndodh e kundërta: propaganda mbizotëron, standardet demokratike cënohen, ka tregues të qartë për cenimin e lirive dhe të drejtave të njeriut, ndërsa korrupsioni i përhapur nuk luftohet, por mbrohet politikisht nga mazhoranca.
Kjo qasje dëmton seriozisht rrugën europiane të Shqipërisë.
Bardhi nënvizoi se Shqipëria ka potencialin për të bërë më shumë dhe qytetarët meritojnë më shumë.
"Është detyra jonë ta bëjmë këtë realitet", përfundoi ai në një postim në rrjetet sociale.
Përditësime
Bardhi dhe Tabaku u takuan me senatorin Giuliomaria Terzi di Sant’Agata, kryetar i Komisionit për Çështjet Europiane në Senatin italian.
Ata akuzuan mazhorancën se ka zhbërë shtyllat e shtetit demokratik, ka cenuar zgjedhjet e lira dhe të ndershme dhe është bërë mburojë e krimit të organizuar dhe korrupsionit.
PD ndan qëndrimin me partnerët ndërkombëtarë për integrimin bazuar në meritë dhe standarde reale.
Bardhi dhe Tabaku u takuan me Giorgio Mulé-n, zëvendëskryetar të Dhomës së Deputetëve italiane. Mulé deklaroi: "Italia ka qenë gjithmonë avokat i interesit të shqiptarëve në institucionet evropiane". Takimi theksoi luftën kundër krimit të organizuar si prioritet kryesor.