Ministrja e Shtetit për Reformën e Administratës Publike dhe Antikorrupsionin, Adea Pirdeni, zhvilloi një takim me ambasadoren e Bashkimit Europian në Shqipëri, Sofia Moreira de Sousa, për të diskutuar mbi avancimin e procesit të integrimit europian. Takimi u përqendrua te sfidat dhe mundësitë në kuadër të negociatave të anëtarësimit, duke veçuar si përparësi absolute reformat në administratën publike dhe masat kundër korrupsionit.
Ambasadorja Sofia Moreira de Sousa rikonfirmoi mbështetjen e plotë të Bashkimit Europian ndaj Shqipërisë, duke nënvizuar se rruga drejt anëtarësimit varet nga ndërtimi i një administrate publike të përgjegjshme dhe parandalimi efektiv i dukurive korruptive. Nga ana e saj, ministrja Adea Pirdeni, e cila mban edhe rolin e Zëvendës Kryenegociatores, theksoi se progresi në këto fusha kyçe duhet të pasqyrohet përmes rezultateve konkrete, të cilat ndikojnë drejtpërdrejt në përmirësimin e marrëdhënieve midis qytetarëve dhe institucioneve shtetërore.
Diskutimet u fokusuan veçanërisht te objektivat përmbyllëse për Grupin 1 të negociatave, i cili përfshin shtyllat themelore të shtetit të së drejtës dhe funksionimit demokratik. Të dyja palët riafirmuan angazhimin për të çuar përpara punën me synim arritjen e standardeve të kërkuara nga Bashkimi Europian.