Ministrja e Shtetit për Administratën Publike dhe Antikorrupsionin, Adea Pirdeni, prezantoi një qasje të re për rekrutimin dhe funksionimin e administratës shtetërore, në kuadër të përgatitjeve për procesin e integrimit evropian.
Sistemi i ri i rekrutimit do të bazohet në një testim kombëtar që do të zhvillohet periodikisht. Kandidatët që kalojnë këtë provim do të pajisen me një certifikatë, e cila do t’u mundësojë atyre të aplikojnë për vende të lira në shërbimin civil brenda një periudhe 4-vjeçare. Ky ndryshim pritet të nxisë konkurrencën dhe të ofrojë mundësi më të mëdha për specialistët që vijnë nga sektori privat.
Lidhur me pozicionet drejtuese, qeveria ka vendosur të zgjerojë hapësirën për rekrutime të jashtme, duke ndryshuar kufizimet e mëparshme që e ndalonin marrjen e drejtuesve jashtë sistemit për më shumë se 20% të vendeve vakante. Kjo masë vlerësohet si thelbësore për të menaxhuar nevojat e administratës në fusha si transformimi digjital dhe menaxhimi i fondeve të Bashkimit Evropian.
Ministrja Pirdeni theksoi se aktualisht po punohet për një strategji të dedikuar për të plotësuar nevojat për ekspertiza specifike, siç janë inxhinierët hidrikë apo të hidrokarbureve, që janë të nevojshme për zhvillimin e vendit. Përpjekjet janë të fokusuara gjithashtu në forcimin e kapaciteteve për kontrollin, transparencën dhe llogaridhënien. Ndërkohë, sa i përket procesit të integrimit, tre kapituj të negociatave me Bashkimin Evropian raportohen se ndodhen në fazën përmbyllëse.